அல் பஹ்ஜதுல் இப்றாஹீமிய்யா அரபுக் கல்லூரியில் நடாத்தப்பட்டுவரும் ஏழு வருடங்களைக் கொண்ட இஸ்லாமிய மற்றும் அரபுக் கற்கைகளுக்கான (மௌலவி) பாடத்திட்டம் இந்தியாவில் உள்ள பிரசித்திப் பெற்ற அல்-பாக்கியாத்துஸ் ஸாலிஹாத் உடைய பாடத்திட்டத்தில் இருந்து சங்கைக்குரிய இமாமுல் அரூஸ் முஹம்மது மாப்பிள்ளை லெப்பை ஆலிம் அவர்களால் அடித்தளமிட்டு கற்றுக்கொடுக்கப்படுகின்றது.

இப்பாடத்திட்டம் பரந்த அளவிலான பாடங்களை உள்ளடக்கியுள்ளது. இல்முல் அகீதா (இறையியற் கொள்கை), இல்முல் பிக்ஹ் (இஸ்லாமிய சட்டக்கலை), இல்முத் தசவ்வுப் (ஆன்மீகத் துறை), இல்முல் ஹதீஸ், இல்முத் தப்சீர் (அல் குர்ஆன் விரிவுரை), இல்முல் மீராஸ் (வாரிசுரிமை சட்டக்கலை) இல்முல் மந்திக் (தர்க்க சாஸ்திரம்), இல்முல் பலாகா (சொல் வண்மைக்கலை) மற்றும் பல இஸ்லாமிய கற்கைகள் பற்றிய விரிவான புரிதலை மாணவர்களுக்கு இப்பாடத்திட்டம் வழங்குகிறது.

இக்கல்லூரியில் கல்விக்கற்கும் நேரத்தில் பேணப்பட வேண்டிய விதிகள் மற்றும் ஒழுக்கங்கள் நன்றாக கவனம் செலுத்தப்படுகின்றது. ஆரம்பத்தில் இருந்தே மாணவர்கள் இக்கல்லூரியின் விதிமுறைகளை கட்டாயமாக கடைபிடிக்க வேண்டும். அரபு மொழி மற்றும் அரபுஇலக்கணத்தில் உறுதியான அடித்தளத்தை உருவாக்க சர்பு, நஹ்வு கலைகளை கற்பிப்பதிலே ஆரம்பக் கட்ட முயற்சிகள் நடைபெறும்.

மாணவர்கள் அதி கூடுதலான பாடங்களை பல நூல்கள் மூலம் கற்க வாய்ப்பு கிடைக்கிறது. இதில் அரபு இலக்கணம், அரபு இலக்கியம், முஹம்மது நபி ஸல்லல்லாஹு அலைஹி வஸல்லம் அவர்களின் வாழ்க்கையைப் பற்றி ஓர் முழுமையான அறிவு, முறையான அரபு எழுத்துத்திறன், உச்சரிப்பு பயிற்சி, இஸ்லாமிய சட்டங்களின் பிரச்சினைகள் வரும் பொழுது அதை தீர்ப்பதற்கான வழிகள், ஹலால் மற்றும் ஹராம் போன்றவைகளை வேறு பிரித்து அறியக்கூடிய அறிவுகள் இக்கலா பீடத்தில் கற்பதனால் கிடைக்கும்.

இக்கல்லூரியின் பாடத்திட்டமானது விமர்சன ரீதியான சிந்தனைகளைப் பற்றிய தெளிவு , ஆராய்ச்சி திறன் மற்றும் இஸ்லாமிய கொள்கைகள் பற்றிய ஆழமான புரிதல் போன்றவைகளை வளர்ப்பதை நோக்கமாகக் கொண்டுள்ளது. மாணவர்கள் விவாதங்களில் ஈடுபடவும், கேள்விகளைக் கேட்கவும், அவர்களின் படிப்பு முழுவதும் பல்வேறு கண்ணோட்டங்களை ஆராயவும் ஊக்குவிக்கப்படுகிறார்கள்.

இக்கல்லூரி பாடநெறிக்கு அப்பாற்பட்ட செயற்பாடுகள் (விளையாட்டு, கல்விச் சுற்றுலாக்கள்) மற்றும் கலாச்சார நிகழ்வுகளில் ஈடுபடக்கூடிய அமைதியான சூழலை கொண்டுள்ளது. இந்த அனுபவங்கள் தனிப்பட்ட வளர்ச்சிக்கு உதவுவதோடு மாணவர்கள் தங்கள் அறிவை நிஜ உலக சூழலில் பயன்படுத்த வாய்ப்பளிக்கின்றது.